ఆమె నేను

నా మౌనం, నిశ్శబ్దం మాటలను క్రీడీకరించి
ప్రపంచానికి వినిపించిన నేస్తం .... ఆమె,
నేను తడబడినప్పుడు, నా కన్నీళ్ళకు
నవ్వులు అద్ది, అవి పువ్వులయ్యేట్లు
ఆసరాగా నా పక్కనే నిలబడి
ధైర్యం చెప్పిన బలం .... ఆమె,
నేను అతి బలహీనుడ్నైన వేళల్లో
ఉత్తేజం ఉల్లాసం నింపి .... నాలో, నాకు
ఎప్పుడైనా .... ఏ అనాలోచిత ఉలికిపాటు
తత్తరపాటు రోగమో వస్తే నయం చేసిన
ప్రకృతి లేపనం ఆమె.
తుఫానుకు ముందు మౌనం వహించిన
శక్తివంతమైన నిండు ప్రశాంతత
నేను కోల్పోలేని నా విశ్వాసం ఆమె.
ఈ అశాశ్వత నశ్వర ప్రపంచం లో
పసి మనసుతో నిండుగా
నిష్కల్మషంగా నవ్వులు త్రుళ్ళించి, కళ్ళతో
నా ఆలోచనలకు కొత్త గమ్యాలను నిర్దేశించి
ప్రతిగా, ఎప్పటికీ జతుంటాననే నమ్మకాన్నిచ్చి 

నా ప్రేమను స్వీకరించిన ఔదార్యం.... ఆమె.
ఆమె జతలో, భయాన్ని తరిమేసి .... నవ్వుతూ నేను.