నాకు తెలిసింది చాలా తక్కువ స్వేదం ఇంకిన ముఖాలు ఆ అరిగిన పాదరక్షలు గోడలపై ఆ రాతలు ఏ శిల్పో అందంగా చెక్కిన అర్ధం కాని ఆ అపురూప చిత్రాలు శోధించాల్సిన రహశ్యాలు ఎన్నో కాలం ఖారాగారంలో నేను అనుభూతి చెందీ .... పాడలేని ఆలాపనల్లా
ఏదో అగాధం వెలితి ఎక్కడో ఉన్నట్లు ఏదో దూరం ఏదో విరామం అధివాస్తవికత వాస్తవికతల మధ్య మనస్సుకు, అంతరిక్షానికి మధ్య ఖాళీ .... ఒకటి బంజరు ఒకటి ఆకాశం లేని సత్యం గుండెలు హత్తుకోని నిజం తప్పించుకోలేని ఈ శూన్య అగాధాల లోతుల్లో ....
ఔనూ .... ఎందుకు ఇలా జరుగుతుంది? ఎందుకు ఈ విధ్వంసం? ఎందుకు నేను నశించిపోతున్నాను? ఎందుకు శూన్యమై పోతున్నాను? ఎందుకు ఈ అయోమయ అసంతులన భావనల్లో మునిగిపోతున్నాను?
ఎందుకు ఈ చిన్న కోరిక చిన్ని ఆశ
ఇప్పటికైనా నీవు నాకు దూరంగా పారిపోవాలి అని కనిపించనంత సూక్ష్మమై పోవాలని
ఇదే సరైన సమయం .... సరంజామా అంతా సర్దుకుని బయల్దేరేందుకు కొత్త లోకానికి ఈ వీధిలోనే .... ప్రయాణం దూరంగా కొండైమీదనుంచి ఎంతో ప్రకాశవంతంగా కనిపిస్తున్నాడు సూర్యుడు
మనిషి మనిషిలా సూర్యుడై స్వయంప్రకాశం తో బ్రతికితే ఎంత బాగుంటుందో
నేను వెళ్ళాలి అనుకునే .... ఊహాతీత ప్రపంచం అది అక్కడ మనిషి శూన్యుడు సర్వమూ .... ఎక్కడో లేని ఇక్కడా కాని ప్రపంచం ప్రతి క్రియకూ ప్రతిక్రియే పర్యవసానం కాని కాలానికి మాత్రమే తెలిసిన బంగారులోకం .... అది
ఆకాశం మాత్రమే అనుభూతి చెందగలిగిన అందమైన బంగారు లోకం మనిషి విపరీత ఆలోచనల విశిష్ట నిర్మాణం .... అందం వనమై ఆనందం తాండవం చేసే ఒక నూతన అనుభూతుల ధామం .... అది
ప్రతిదీ ప్రతి ఒక్కరూ పట్టించుకోని ఎవరు ఎవరినైనా వారి జీవితం కంటే ఎక్కువగా ప్రేమించగలిగే ఏ సామాజిక కట్టుబాట్ల గోడలూ ఎవరినీ ఇష్టానికి భిన్నంగా బంధించలేని ....
స్వేచ్చగా ఆలోచించగలిగే .... ఎవరి కాళ్ళ మీద వారు నిలబడి నిండుగా శ్వాసించగలిగే అస్పష్ట, నిరాకార, సూక్ష్మరూపులయ్యేలా కష్టాలు బాధలు అందువల్ల కలిగే నొప్పులు ను శాశ్వతంగా వొదిలెయ్యగలిగేలా
ఆ ప్రపంచంలో మనిషి సమాధి స్థితి లో తన్మయత్వం లో వ్రేలాడొచ్చు
బూత వర్తమానాల్లో మనిషి మునిగి తెలుతూ ఊగిసలాడుతుండొచ్చు చీకటి కాంతి తెరల మధ్య .... అక్కడ తప్పులు దిద్దుకునేందుకు భూతం లోకి వర్తమానం లోంచి .... ప్రయాణం సాధ్యమే
పోగొట్టుకోలేని కావాలనుకుని పొందలేని నిర్మలత్వం, నిరాకారం నీవు ఎక్కడికి వెళ్ళినా సర్వం నీవేలా ఉండి ఆరంభమూ అంతమూ కాని హృదయం నిండిపోయిన సమర్పణా భావన అనుభూతివై ప్రతిచోటా ఉండి కళ్ళతో చూడలేని దైవత్వానివి, నీవు గాలిలోనూ నేలమీదా అంతటా వ్యాపించిన బ్రహ్మాండం బ్రద్దలైన నిశ్శబ్దం శబ్దానివి