అలసత్వం

ఎంత చిట్లించుకుని చూసినా 
కళ్ళముందు
అస్పష్ట అంధకారమే 
నిక్కబొడుచుకుని
విందామని చూసినా
స్తబ్ధ అస్పష్టతే
మోసపోయి
తిరస్కరించబడి
విశ్వాస ఘాతుక ప్రవాహంలో
కొట్టుకుపోతున్నప్పటి 
భీతావహత ఆవహించినట్లు
ఎంత బాధాకరమో
ఈ నొప్పిని భరించడం
దురదృష్టం అనుకోనా
కేవలం విశ్వసనీయత
లోపించడం వల్లే అనుకోనా
ఒకవేళ
కన్నీళ్ళే మాట్లాడగలిగితే ....
గుండె కవాటాల్ని పగులగొట్టి 
నొప్పిని స్థానభ్రంశము చెయ్యగలనేమో  
గుండె శిల కాకపొతే
మరమ్మత్తు చేసి!?
సాధ్యం కాదని తెలిసీ 
నమ్మకం నశించిన చోట
నమ్మకం పొందె యోగ్యత లేని చోట
పెనం మీద మాడిన వంటకు
మాననీయతను కలిగించడం లాంటి
నిరర్ధక పరిచర్యలు

కన్నీటి చార

ఊటలా ....
ఎద ఉబికిన
కన్నీటి
అసంపూర్ణతానుభూతి
నేను

ఎండిన కనురెప్పలు
అసహనత కురిసి 
వేదన కరిచి  
ఎద గుచ్చిన
కోపోధృతి,
అస్తిత్వం మసకేసిన   
పెనుగులాట
భావోద్వేగం .... నాలో

అయినా

నిన్ను చూసేందుకు
నీకోసమే ఎదురుచూస్తూ
చిరునవ్వొకటి
విచ్చుకునే ఉంది

సిరాతో ....

బొట్లు బొట్లుగా
ఊటలా
వేళ్ళలోంచి
సిరా ....

నా సిరలు
దమనులు
సిరామయం
అన్నట్లు 

ఎన్ని
చిరు కవితలో
కథలో 
కన్నీటి బొట్లుగా 

జారి
పారి 
ఈ మెదడు
కాల్వనుంచి