Wednesday, December 31, 2014

సహజగుణం


నిన్నటి
ఎదురుదెబ్బల అనుభవాలు
ఆనందపు అనుభూతులు
గాయాల్లా
గాయాలవల్ల ఏర్పడిన మచ్చల్లా
చెరగని గుర్తుల్లా
ఆత్మ ఆవిష్కరణలు లా
ఎద లోతుల్లో ....
అంతరంగం మూలల్లో
గాయం వల్ల ఏర్పడిన నొప్పిలా
నెమ్మదిగా,
మెల్లమెల్లగా కనుమరుగవుతూ 


ఔనూ!
నిజంగా ప్రేమ ఇంత ఖరీదైనదా?
ఆశ్చర్యం వేస్తుంది కదూ!
సాయం సంద్యా సమయం లో
ఒకప్పుడు
నాకోసం నీవూ, నీకోసం నేనూ
ఆ ఎదురుచూపుల వెంపర్లాటలు
ఆ విరిసిన చిరునవ్వు అత్తరులు
ఆ ఆనందహేళా కేళీ విహారాలు.
మరి ఎందుకో .... నేడు, ఈ నిర్లిప్తతలు
వడలిన పరిమళాలులా
మరుగున పడిపోతున్న ఆకర్షణలు
మార్పుకు కారణం కాలమేనా!?
నా, నీ మది ఎదల సహజ గుణమా!?

జీవన సంద్యాసమయం లో


కండ్లు చెదిరే కాంతిపుంజాలు,
కన్నీళ్ల బంధనాలు


జీవ సంద్రం మధ్య లో
ఎగసిపడే అలల
ఆశల్లా
లోలోతుకు లాగేసే సుడిగుండాల
లోతుల్లా

Tuesday, December 30, 2014

ఏమరిపాటనుకునేవు!?


మేలుకుంటే ఒకవేళ
ఏ వేకువజామునో
అకారణం గా పరితపిస్తుంటే
సహజమూ ఉలికిపాటే అనుకుని
జరిగిపోకేం!?
నీవు నమ్మాల్సిన నిజమొకటుంది. 


కలలోనూ .... నేనొక భగ్నప్రేమికుడ్నని
పొదరిళ్ళ తోటలో, వెన్నెలవేళల్లో
రాలిన పూపరిమళాల రేకుల్లో
తియ్యని అనుభూతుల్ని ఏరుకుంటూ
కన్నెర్రచేసిన కాలం పంజరం లో
చిక్కుకుని ఊపిరాడని
భావుక పావురాన్నని

Monday, December 29, 2014

చెలీ కుశలమా!?


నిన్నే అనుసరిస్తున్నాను
ఒక నీడలా
నీ దరిదాపుల్లో
నీ కనుచూపు మేరలో .... ఎప్పుడూ
ఏ కాలమూ
ఏ శక్తీ
నన్ను నీనుంచి దూరం చెయ్యలేనంతగా 
నీవే నా జీవన గమ్యానివి అన్నంతగా

నా ఈ లక్ష్యం
నీవు
నా హృదయాన్ని తాకిన క్షణం నుంచే
ఏ సముద్రాల లోతులూ
ఏ శిఖరాల ఎత్తులూ
అడ్డంకులు కాలేనంతగా
నన్ను దూరంగా ఉంచలేనంతగా
నీపట్ల ఈ ప్రియభావన  


నిన్ను ప్రేమించా
ప్రేమిస్తున్నా, ప్రేమిస్తా ....
ఎలా, ఎక్కడ ఉన్నా
ఏమైపోతావో అని 
ఎవరూ దూరంగా ఉంచలేనంత దగ్గరగా
నీతో, 
నీ నీడలా
నిన్నే అనుసరిస్తూ ....

నేనే నీవన్నట్లు
అడుగులో అడుగును లా 
నీడలా, నిజమైన శాశ్వత ప్రేమను లా
ఒక పరిమళాన్నై .... ఎప్పటికీ
పరిభ్రమిస్తూ .... నీ చుట్టూ
ఏ హిమాలయాల ఎత్తులూ
ఏ పసిఫిక్ మహాసముద్రాల లోతులూ
దూరంగా ఉంచలేనంత గాడంగా

Sunday, December 28, 2014

చిత్రంగా!


గుర్తుతెచ్చుకోమంటూ
నేనంటే ఎంత ప్రేమో నీకు అని

ఎవరో
బహుశ ఆ ఎవరో నీవే అనుకుంటా

గుసగుసలాడుతున్నట్లుంది.
నాకు అంత అత్యాశ లేదు అని అంటున్నట్లు

నీవెప్పుడూ నన్నిలానే ప్రేమిస్తూ ఉండకపోయినా
కానీ నీకు గుర్తుండిపోతే చాలని అనుకుంటున్నట్లు

నా పట్ల నీ ప్రేమ .... పదిలంగా ఉంటుందని,
గుర్తుంచుకుంటానని మాటిస్తావా .... అంటున్నట్లు

కన్నీళ్ళ పర్యంతం అయి
నా ప్రాణంలో ప్రాణం ఎవరోలా .... ఎదురుగా నీవున్నట్లు

నేను నేను కానట్లు ....
ఎక్కడో నాలో నన్ను కోల్పోయినట్లు

Saturday, December 20, 2014

వీడుకోలు


కూడగట్టుకున్నా!
కాసింత ధైర్యం విశ్వాసం ఈ ఉదయం,
తేరిపార చూసాక
ప్రశాంతతను నీ ముఖం పై
కప్పేసిన పూలమాలలు దాచేసిన జీవపరిమళాన్ని
ఆ రాలిన పువ్వులవెనుక మాయమైన నవ్వుల మెరుపులను
పారిపోయిన ఆ గలగలల నవ్వుల శబ్దాలను
నిజాన్ని జీర్ణించుకోవడం చాలా కష్టం
కానీ తప్పలేదు
నీ ఆత్మను ఎదురుచూస్తూ ఉండమనలేక.
వీడ్కోలు చెప్పక తప్పని సమయం
పిల్లా! బయలుదేరు నువ్విక స్వర్గానికి అనక
పోరాట విరమణ తప్పలేదు. 


కాలానిదా కన్నీటిదా తర్జన బర్జన 
ఎవరిది తప్పో ఎవరిది ఒప్పో అనే పట్టింపులకు సమయం కాదు.
సెలవు తీసుకోవాల్సిన వయస్సులో
సూర్యోదయానికి ఎదురుగా మండుటెండలో
ముందుకు కదలాల్సిన స్థితి
కష్టాలన్నిటికీ మందు కాలమే అనుకుని
పురోగమించక తప్పని స్థితి
నీకు తెలుసా .... పిల్లా!
ప్రేమతో నీవూ నేనూ పంచుకున్న క్షణాలు
ఆ మధురానుభూతులు
కాలగతిలో ఏనాడో జారిపోయాయని.
అయినా ఇప్పుడు అంతరంగంలో నీ గొంతు
నా క్షేమాన్నే ఆకాంక్షిస్తూ .... మందలిస్తూ,
గర్వంగా ఉంది వింటున్నప్పుడు 
ఆనందంగా నీకు వీడ్కోలు పలుకుతున్నందుకు

Friday, December 19, 2014

ఎర్ర గులాబీ


ఒంటరి,
సోమరి జీవితం,
మరణం అంటే ఇష్టం
సాన్నిహిత్యం కన్నా
అదేమిటో? ఎందుకో?

సాహచర్యం
ఒక విలాసవంతమైన
బలహీనత
నేను భరించలేను అని
అనిపిస్తుందే కాని

రకరకాల అస్తిత్వాల
పెనుగులాటల
ప్రాభవం నుంచి
రక్షించుకోలేనేమో అని
నన్ను నేను

ఏ వ్యసనం
పోషనార్ధం
ఎవరి రక్తం చిందడానికి
ఇష్టపడుతున్నానో ....
ద్వేషం ముల్లునై


ఒక మొగ్గను
పువ్వునై ....
పరిమళించి, వడలి, రాలి
భావుకత్వపు అగాధం
లోతుల్లోకి జారిపోతుంటాను.

గాలికి నా అవశేషాలు
చెత్తలో దుమ్ములో దూళిలో
కలిసిపోతాయని తెలిసీ
మనిషి సాహచర్యం
భరించలేను, ఎందుకో

Thursday, December 18, 2014

పర్యవసానం కీడే అయితే


శూన్యత
క్షీణత
పరిణమించి పిచ్చితనం
తొక్కి అణిచివేయబడి ....
అస్తిత్వం
దుమ్ము లో దూళై
చిద్రమై ఆలోచనలు
మెదడు విభజన లా
ధ్రువీకరణ కోసం
వెర్రిగా
చేతులు తురుముతూ
తల
సన్నని గాలి
అక్షరాల .... అల్లికలు
సాలిగూడు అమరికలు
పదాలు, అరుపులు
మట్టిపురుగులు లా
మాంసం శరీరం త్రవ్వి ....
సలిపి గాయం
నొప్పి,
వ్యాపించి
పుర్రె ను
అనంత ఆవేదన
తేజరహిత
బాధరహిత
అస్తిత్వ అనాశక్తత

Friday, December 12, 2014

అమ్మాయాత్మనుకుని


కవి కవయిత్రుల
భావనల
అక్షర రూపాలు
పద పానీయాలు
పద్యాల శ్వాస
కవితల నులకమంచం
నిద్దురలో
పలువరింతలు

Wednesday, December 10, 2014

ప్రియ మానసీ ....



ప్రియ మానసీ! రాక్షసీ!! తెలుసుకో!!!
తెలుసుకో .... ప్రేమంటూ ఒక్కటుంది అని,
దానికి అర్ధం కేవలం నీవూ నేనే అని,
నిక్షిప్తమై .... నీకూ నాకూ మధ్య అది
అంతులేని నిధై ఉందని, 
ఆ నిధిని పొందేందుకే ....
నేను నిన్ను ప్రేమిస్తున్నాను అని,
పొందాను కనుకే నిన్ను కోల్పో లేను అని,
దాచుకుంటానే కాని వొదులుకోలేను అని,
అంత అమితమైన ప్రేమ .... నాకు నీవంటే
నీవో ఉచ్ఛమైన గమ్యానివి .... నాకు
ఒక ఉదయించే కిరణానివి
ఒక కురిసే స్వేదపు చినుకువి.
పిచ్చివాడిని లా పరిభ్రమింపచేస్తున్నావు నన్ను
ఓ పిల్లా! పదే పదే .... నీపట్ల ప్రేమ నాలో
నీవూ ఒక్కసారి నిజమని చెప్పు .... నీ ప్రేమను
అసంబంధంగా ఏమీ చేయవని చెప్పవని తెలుసు.
గమనించి తీరాలి ఈ నిజాన్ని ....
నీపట్ల నాలో ఉన్న నా అపరిమిత ప్రేమను
ఒక్కసారి నా గుండె గుసగుసలు వినిచూడు
ఎవరూ లేని చోట
నీవూ నేనై కలిసి జీవించుదాం అని పలవరిస్తుంది.
నీ మనసు సౌలభ్యం వివరించు
ఎలా ప్రేమించాలో నిన్ను
ఆలోచిస్తాను అనుసరిస్తాను
అన్నివేళలా ....
నాకు తెలుసు నీకూ తెలుసని
నా మనోభావనలలో
ఎప్పటికీ నేను కోరుకుంటున్నది, నిన్నూ
నీ ప్రేమనే అని
నేను నీతో ఉన్న ప్రతిసారీ
నీ ప్రేమలో మునుగుతూ తేలుతుంటానని 
నిండుగా అని, మాటిస్తున్నానని .... ఓ పిల్లా!

Tuesday, December 9, 2014

అయితే


ఎవరూ నమ్మని ప్రియభావన
నీవూ నేనూ ప్రేమలో పడిపోవడం
ఒక్కరిమైపోవడం
ముందుగా ఊహించని విషయమే
నాలో నీ నివాసం నిజమై సహధర్మం కావడం
నీ చేరువతనం ప్రేమై, బంధమై నడిపిస్తుండటం
కొన్ని కొన్ని సమయాల్లో ఆశ, నమ్మకం కోల్పోయి
సొంతం నిజం కావాల్సి కాని
బహుమానల నిధులెన్నో .... అన్న
నిజం ఉదాహరణలమై 

అన్నీ వినూత్నం గా
కోరుకున్నట్లుగా
మళ్ళీ జన్మించిన భావన కలుగుతూ
చూస్తుండగలగడం
ఒకరిలో ఒకరు ఒకరికొకరమై
నా, నీ కళ్ళలో ప్రతిబింబిస్తున్న
అది చాలు .... అన్న సంతృప్తి భావన
ఆ భావన వెనుక ప్రేరణనిస్తూ ప్రేమ
పరిక్షలనెన్నో ఎదుర్కొని
పురోగమించేందుకు మార్గదర్శి లా 


ఏ ప్రేమ పోరాటం లో అయినా
గెలుపు ఒక ఆకస్మిక పరిణామమే
కలిసి జీవించేందుకు
కొంత స్వీయతను కోల్పోయేందుకు
నమ్మిన నిజాలు కొన్ని అబద్దాలైనా
సర్ధుకుని, సహకరించుకుని
ఆలోచనలలో వెసులుబాటు
ఆచరణలో సంయమనం ప్రదర్శించి
పురోగమిస్తే ....
అప్పుడు ప్రేమ ఎవరికైనా మార్గదర్శే

ఒంటరినే నేను


 సాహిత్యం రాయను.
రాసేందుకు
నేను రచయితను కాను.
ఇబ్బందిగా ఉంటుంది ....
వెటకారం లా అనిపిస్తుంది.
ప్రస్తుతిస్తే ....
ఎవరైనా అలా

నావి
కాలక్షేపపు రాతలు
ఏమీ తోచనప్పుడు,
ఒంటరిగా ఉన్నప్పుడు,
చెసేందుకు ఏమీలేనప్పుడు ....
ఒంటరిని అని
అనుకుంటున్నప్పుడు, 


ఎందరో అడిగారు.
నువ్వెలా
ఒంటరివి అవుతావు అని?
ఒంటరితనానికి
అర్ధం ఏమిటి అని?

చుట్టూ ఎవ్వరూ లేనంత మాత్రాన
ఒంటరిని అని అర్ధం కాదు.
ఎందరో చుట్టూ ఉండి,
ఎవరూ గుర్తించనట్లు,
అర్ధంచేసుకునే ప్రయత్నం చెయ్యనట్లు ....
నా వారు కానట్లుండటం .... కూడా
ఒంటరితనమే

సమూహం లో
ఉన్నంత మాత్రాన
ఒంటరిని కానట్లు కాదు ....
నా ఉద్దేశ్యం లో
సమీపం లో
ఏ స్నేహితులూ
ఏ ఆత్మీయులూ
లేకపోవడం కూడా


నేను ఒంటరినే
వచ్చినప్పుడు,
ఇప్పుడూ
పోయేప్పుడు .... కూడా
డబ్బు ఎంతున్నా
పరపతి ఎంతున్నా
ఒంటరినే నేను

Monday, December 8, 2014

ప్రేమను కోల్పోయి....


ఎవరి అనురాగం ఆలోచనల లోనో
స్థానం కోల్పోయి 
ఉత్తమ స్నేహాన్ని కోల్పోయినప్పుడు
అనిపిస్తుంటుంది.
అంతా శూన్యం లా అనిపిస్తుందేమిటీ
ప్రేమను కోల్పోయానేమో అని.
నిజమైన ప్రేమను కోల్పోవడం
నిజంగా సాధ్యమా!?
నిజంగా అది ప్రేమను కోల్పోవడమా?
లేక అది పరిక్షా సమయమా?
 
ఆరంభం లో
మనసు పంచుకుని మాట్లాడాల్సిన చెలి
ఆర్ద్రంగా పలికినా, ఒత్తి ఒత్తి పలికినా
పక్కనే ఉండీ పట్టనట్లు మాట్లాడనప్పుడు,
వినాలనుకోనప్పుడు .... ఏర్పడే రోషం
నొప్పిని చెప్పుకోలేక, భయాన్ని విడమర్చనూ లేక
ఆ శీతల రాత్రుల జీవితం
దుర్భరం భారమై కరగక .... ఉదయాన్నీ కోరుకోలేక
కాలాన్ని ద్వేషిస్తూ .... దశ దిశ గమ్యం లేని
భవిష్యత్తు పై ఆశను పట్టింపును కోల్పోయి

చిన్న చిన్న సంఘటనలకూ
చిరు అలజడులకూ స్పందించే హృదయం
ఇంతటి ఆకశ్మిక సంఘటన తాకిడికి
అల్లాడక, ఉల్లాసాపడక .... నిరాసక్తంగా
కళ్ళలో .... దయ, కరుణ, అనురాగం కోల్పోయి
నిర్లిప్తత, నిరాపేక్షతతో నిండిపోయి 
అకారణంగా కారుతూ .... కన్నీళ్ళు
నమ్మలేని సంఘటనలు నిజాలు ఐనా,
కళ్ళముందు ప్రపంచం కుప్పకూలినా 
ఆశ్చర్యపోక 


ఇంతటి అసాధారణ నష్టం వాటిల్లినా
ఆ క్షణాల్నీ, లక్షణాల్ని .... సంగటనల్ని
స్వీయ వైఫల్యం
విధి వైఫల్యం అనుకోలేక
ఏమీ పట్టనట్లు ఉండగలుగడం
ఏ కల, ఏ ఆశ నెరవేరని
ఏ గమ్యమూ లేని స్థితి లో ఊగిసలాడడం
ఏ ప్రాణికైనా ఎలా సాధ్యమా అనిపించేలా

ఏ పరిక్షను ఎదుర్కోలేని ప్రేమలా ....
ఔను, పరిక్షలో నెగ్గని ప్రేమ
అది ఓటమిని అంగీకరించలేని ఉమ్మదం సమయం.
ఓటమిని, కోల్పోవడం గా భావించడం
అవిజ్ఞత పలాయనం అనిపిస్తుంది.
అమరం అని చెప్పుకునే
ప్రేమకు నిజంగా ముగింపు ఉంటుందా!?
ప్రేమ బహుమానమే అయితే .... న్యాయమా!?
బలవంతంగా పొందాలనుకోవడం

Saturday, December 6, 2014

కుశలమా అందమా!?


ఓ అనాఘ్రాతపుష్పమా!
రంగు రంగుల పరికిణీలో
నిండుగా,
అందంగా ....
చలికాలం, చల్లదనం
గట్టిబడే గుణాత్ముడుని అయిన
నా స్పర్శ
నా సన్నిహితత్వం
మోటుతనంలా తాకిందా .... నిన్ను!
అబాండం! వేస్తున్నావు.
నీ అందం
నీ వికాసం
నీ పరిమళాలను కోల్పోయి
రేకులు రాలి
వడలిపోయి
అస్తిత్వం ప్రాణం కోల్పోయి
నేల రాలావా!
కారణం నేనేనా!?
చిత్రం!
ఎవరి కోసం ఏ నమ్మకం తో
ఆ ఎదురుచూపులు!?
అభియోగమా!?
ఫలితం ఉండదు.
లోకమంతా స్వార్ధపరులు
కఠినాత్ములే .... నాకన్నా
నా నిష్క్రమణ కోసం చూస్తున్నావా!?
సరే, వెళ్ళిపోతాను.
ఆ సూర్యుడు వెచ్చదనం
ఆగమనం కోసమా .... ఆ నిరీక్షణ
ఆ రవి కిరణాలు
సూటిగా చెరే క్షణాల కోసమేనా!
నిజం గా మళ్ళీ పుడతావా!?
నిండుగా,
అందంగా,
అనాఘ్రాతపుష్పం లా .... పరిమళిస్తావా!?
సరే మరి!
వసంతుడొచ్చి వెళ్ళాక వస్తా
నిన్ను పరామర్శించి స్పర్శించేందుకు!

Wednesday, December 3, 2014

సొంతమైపోవడమంటే .... ఇంతేకదూ!?


నీవు నవ్వుతున్నప్పుడు
పదే పదే చూస్తూ ఉండాలనిపించడం
అతకని అబద్దాలు ఆడి
నీవు దొరికిపోవాలనుకోవడం
నీ సాంగత్యం లో
ఊపిరి బిగబట్టాల్సిన క్షణాలే
అపరిమితంగా ఉండాలనిపించడం 

నీ ఉద్దేశ్యం ఇదీ అని
అర్ధం అయ్యి
నా ఆలోచనల అర్ధం
ఉద్దేశ్యమూ
అదే అవ్వాలనిపించడం
నీవు నాకు నచ్చడం? ....
అపరిమితంగా  


నీ కోరిక ఒకటి తీర్చుతున్నప్పుడు
వేరేదో నీవు కోరాలనుకోవడం
నీవు నన్ను పట్టించుకోనట్లు
అయిష్టాన్ని నటించాలనిపించడం 
నీ ఇష్టానికి వ్యతిరేకం గా
ఎప్పుడైనా
నేను కాబట్టే
ఆపగలను అనిపించడం

ఇంతేనా ....
ఏమో ....
చెప్పవా చెలీ!?
నిజంగా సొంతమైపోవడమంటే ....

Tuesday, December 2, 2014

ప్రేరణ


కాంతి లోపించిన,
చీకటి లో
నన్ను నేను
కనుగొనేందుకు 

వెలుగులా
ఆశా కిరణానివి లా
ఒక ఆవేశం లా ....
నీవు

పోరాట స్పూర్తి,
బలానివై
పురోగమనము, పెరుగుదల
అర్ధానివై 


ముసుగును తొలగించుకుని
రాత్తిరి చీకటి లో .... నేను
వెన్నెల ఆనందాన్ని పొందేందుకు
కారణానివి అయి ....

చెలీ! నీకు ధన్యవాదాలు
నన్నొదలని నీడవై, ఎల్లప్పుడూ
నా వెనుక ఉండి
నన్ను నడిపిస్తున్న ప్రేరణవైనందుకు

విధి వైచిత్రం



ఆత్మ దాహం తీరకుండానే
ఆవిరైపోవడం 
అవయవాలు పాటవాన్ని కోల్పోవడం
మదిలోని అగ్ని చల్లబడటం
వశీకరించబడిన కాఫీ కప్పై .... జీవితం, 


 











కప్పు అంచు తాకి
పెదవులు చురుక్కుమనకపోవడం
కనికరం లేని కాలం
యుగాలుగా చేస్తూ ఉన్న
దోపిడి దొంగతనాలకు ఉదాహరణ .... ?

Monday, December 1, 2014

బాధాక్షరాలు


గుండెను అరచేతిలో పట్టుకుని
గోడల మధ్య ఊపిరిని, లయబద్దతను
ఆమె, విద్వంసం చేసినప్పుడు
మెల్లగా బుగ్గలమీంచి జారిన
ఎర్రటి కన్నీటి బొట్లు
నరకానుభవాన్ని చూపిస్తాయని

అక్కడే అలాగే ఉండిపోక తప్పదని.
ఆ నయగారం హస్తం
పట్టులోంచి తప్పించుకోలేకే ....
ఆమె చేతులు
నా పక్కటెముకలను లోపల నుంచి చీల్చుతున్నా
నిశ్చేష్టుడ్నయ్యానే గాని అని 


ఊహించగలిగిన వారికే అర్ధం అవుతుంది.
అనుభవానికొస్తేనే తెలుస్తుంది.
పువ్వనుకుని
ముల్లును ముద్దాడిన గాయం
ఉదృతమైన బాధాక్షర భావనల అలజడి
మనఃస్థితి నాలో అని

Sunday, November 30, 2014

చెప్పాలని ఉంది


ఓ అందమా! అనుబంధమా!! 
నా మనో ఆకాశం నక్షత్రమా!!! 
నేన్నిన్ను ప్రేమిస్తున్నాను.
రాత్రి విశ్రమ వేళలలో
చల్ల గాలుల బద్దకపు కదలికలలో
చెట్ల కొమ్మల ఆకుల గుసగుసల సడి,
చిరు సవ్వడుల మధ్య
జీవితం వెలుగులమయం
సాధ్యం కారణం .... నీవే
నీ రాక తోనే .... నిశ్శబ్దం గానే

సాధారణంగా 
ప్రతిమనిషి భయపడే విషయాలు ఎన్నో
అందులో ఒకటి
గుర్తింపును కోల్పోవడం
ఉండను చూడను అని తెలిసీ
మరణించాక కూడా
ఎక్కడ అందరూ మరిచిపోతారో
ఏమనుకుంటారో అనే భయం
కొందరు మరిచిపోవడం ఊహించనూ లేము.


నేను కూడా అంతే!
నీవు మరిచిపోవని నమ్మకం ఉన్నా
ఎక్కడ మరిచిపోతావో
నన్నెరుగనని మోసగించుకుంటావో
అసహ్యించుకుంటావో అని
భయం!

తేనె కన్న తియ్యనిది.
ప్రేమ కన్నా స్వచ్చము పవిత్రమైనది
నీ మనసని తెలుసు.
మంచు బిందువులు
చిగురాకులపై మురికిని కడిగినట్లు
నీ సున్నిత మృధు ఆలోచనలతో
రావణుడ్ని రాముడ్ని చేసిన
దేవతా లక్షణమూర్తివి .... నిన్నూ
నీ వ్యక్తిత్వాన్ని కోల్పో లేను.

వికారము, వికృతము .... భయం ఆలోచనలు
వెంటాడే కలలు
దూరం చేసిన అందం, నీ ముఖం
ఆహ్లాదకరం .... నీ మృదు పలుకులు
నాకోసమే దివి నుంచి దిగివచ్చిన 
అనుభూతి .... దేవతా స్త్రీవేమో అనిపిస్తూ
నీతో చెప్పాలని అనిపిస్తుంటుంది.
నా హృదయాన్ని నీకు
సమర్పించుకున్నానని .... శాశ్వతంగా అని
నేన్నిన్నే ప్రేమిస్తున్నాను అని
మనసు విప్పాలని, నీతో చెప్పాలని

సుతిమెత్తని మానసం


ఆమె
అతని వైపే
నడిచి వెళుతూ ఉంది.
ఎక్కడ
అతనికి
నిద్దుర భంగం అవుతుందో అన్నట్లు
సిగ పువ్వులను విసర్జించి మరీ,
గడ్డి మైదానం లో
నిదురిస్తున్న మృగరాజుల మధ్య
నడుస్తున్నంత జాగ్రత్తగా
అడుగులో అడుగు వేస్తూ ....
పిచ్చి ప్రేమే ఆమెది
బిడ్డడిని
ఒడిలోకి తీసుకుని
ముద్దాడలేని కన్నతల్లి
అలవికాని
మమకారం, తపనే అది
ఏ గణితము
లెక్కకూ
అందనన్నో సారి ఆమె అలా

Saturday, November 29, 2014

ప్రేమామృతం


నిర్మలం గా పలుకరించి
తియ్యగా, రుచిగా అమాయకంగా
మమైకమైపోయి
ప్రేమ ....
ఒక రస వాహిని
ఏ స్వర్గపు ఆకాశ హర్మ్యాల నుండో
జల్లిన అమృతపు చినుకుల అమరత్వం లా

ప్రేమ, కాదనుకోవడం .... మధ్య
ఒక లక్ష్మణ రేఖ
ఒక సన్నని అనుమానం పిచ్చి గీత చాలు
ప్రేమను కోల్పోయి
గుండెలు ద్వేషం తో ప్రతిధ్వనించి
మది ఒత్తిడికి లోను కావడానికి


జీవితాన్ని జయిస్తుంది ప్రేమ
హృదయం
విధేయం గా ఉంటే చాలు
బంగారం తో చెయ్యబడినది 
శరమే అయినా పంజరమే అయినా
కలలు కూలిపోక తప్పదు.

పరితాపం


తోడూ నీడ
ఆసరా ను కోల్పోయిన
ఒక సగటు స్త్రీ ....
ఆమె
జీవితం ఎడారిలో
ప్రేమ దాహం తీర్చుకునేందుకు
మమకారాన్ని కాదనుకుని
కావాలనుకున్న వాడితో
ముందుకు కదిలి
అకస్మాత్తు విపత్తు లో
సంరక్షణను కోల్పోయి
నిర్భాగ్యురాలై,
నొప్పి మాత్రమే మిగిలిన
జీవత్శవం .... 


ఏ మోహాపేక్ష లేని
నిష్కల్మష ఆలోచనలే తోడుగా
విశ్వాసమే బలం గా
సాక్ష్యం గా ..... ఒంటరిగా
జీవన సమరానికి సిద్దమయ్యి
ప్రశ్నించిన సమాజానికి
బదులిచ్చింది
కత్తి తో గుండెను చీల్చుకుని .... మరీ
ఎవరూ నమ్మలేదు.
అందరూ దూరం గా జరిగిపోయారు.
నిజాన్ని చూసే ఇష్టం లేకో
చిరిగిన అర్ధ నగ్నత్వాన్ని మాత్రమే చూసో
వేట ఆరంభం అయ్యింది.
విట కీచక విన్యాసాలు
వలలు, దౌర్జన్యాలు
ఒంటరి పోరాటం లో
అసహాయురాలు ఆమె
చివరికి .... పరిణామం
రాక్షసత్వపు ఎంగిలి తడి తాకిన
పెదాలు కుట్టేసుకుని ....
సమాధుల శకలాల మధ్య
గాయపడిన పావురం లా ....
సంరక్షించలేని సమాజానికి
ప్రశ్నించే అధికారమా అని!?
ప్రశ్నల సెగలను వీస్తూ
అనాద ప్రేతం లా
ప్రశాంతతే .... నిద్దుర లో

ప్రేమలోనే పిచ్చి ఉందా?


నాకు తెలియకుండానే 
నా హృదయం పిచ్చిదైపోయింది.
లయబద్దంగా కొట్టుకోవడం మానేసి
నీది ద్రోహ చింతన తెలిసి

అయినా
పిచ్చి నమ్మకమే
అలవికాని ప్రేమే ఇంకా
అపార్ధం చేసుకుంటున్నానేమో అని 


అందుకే
సిరలను తెరుచుకుని రక్తం....తో
శ్రమ స్వేదం....తో
నీ ఆకలి తీర్చాలని
నిన్ను రక్షించుకోవాలని .... ఉంది.

రాక్షసత్వం పనుల
చెడు ఆలోచనలనుంచి .... నిన్ను
కాపాడుకోవాలని
తెలియని ఓ వింత తపన .... ఇంకా నాలో

Friday, November 28, 2014

రావా పిల్లా! దరివై .... ఎదురు


నన్ను నేను కనుగొనేందుకు,
నా తొలి అడుగులు
తప్పులు దిద్దుకునేందుకు
అవగతం చేసుకుందుకు.
రావా పిల్లా! .... దరికి
తెలుసుకుందుకు
జన్మజన్మల అందమైన బాంధవ్యాన్ని 
నీవు నన్నెరుగుదువనే నిజాన్ని
కేవలం నీకు మాత్రమే తెలిసి
నీవే అని తెలియని గమ్యం వైపు
తడబాటు అడుగులు వేస్తున్నానని

మూసుకొనలేని కళ్ళను 
తెరుచుకునున్న హృదయ ద్వారాలను
భావుకుడ్నై ఉద్వేగం
ఉత్సుకత తపన చెందుతున్న క్షణాల్లో
అది నీ కోసమే అని తెలియక
నీ మార్గదర్శకత్వం కై మది ....
అలమటిస్తున్న క్షణాల్లో
రావా పిల్లా! దరికి ....
నన్ను కదిలించేందుకు
నీ నా నీడలను ఒకటి చేసేందుకు


ఆకర్షిత అయి నా ఎద నీ పట్ల ....
నీ దరి చేరాలని ఊగిసలాడే క్షణాల్లో....
తుళ్ళిపడకుండా ఉండేందుకు
పసి నడక నేర్చుకుంటూ
రాసుకుంటున్న సాహిత్యపు
ప్రేమ రాగం, జీవ మాధుర్యం భావం
నీవై నీ దరి చేరువవుతున్నట్లు
నేను కంటున్నది కల కాదని
నా జీవన గమ్యం .... కారణం
నీవని నమ్ముకుంటున్న క్షణాలలో
రావా పిల్లా!
భావుకత్వపరం గా నీవాడినే అని ....
నీవు లేని సంపూర్ణత లేదని .... నాకు

ఎదురుగా ఉంటే చాలు నీవు
ఆలోచనలే రావు
మనసే లేనట్లు
అంతా కలే అన్నట్లు
ఏదో వింత
అదో పిచ్చి .... అయినా
అదే అనుభూతి కావాలనిపిస్తూ,
నిన్ను మాత్రమే నేను .... ఎరిగున్నట్లు
కోరుకుంటున్నట్లు
ఆ కోరికే నా సంతృప్తి అన్నట్లు

రావా పిల్లా! దరికి ఇప్పటికైనా
చేతులు బార్లా చాచి
గుండెను తెరిచి ....
నన్ను కట్టిపడేసిన
ఏ తెలియని బంధం కోసమో ....
నా జీవసాగరం దరి నీవను బ్రమ లో
నీవైపుకే కదులుతూ
స్వేదానందం చెందుతూ 
నీవైపుకే చేరవస్తున్న నాకు ....
రావా పిల్లా .... దరివై .... ఎదురు

వెన్నెల కరిచిన రాత్తిరి


ఎంతో అందమైన రాత్తిరి
తియ్యని
వింత గగురుపాటు నరకపు చలి లో
విపత్తును మోసుకునొచ్చినట్లు
గాలి వాసన

చంద్రుడి ఆకర్షణా శక్తి కి
ముఖం పై
ముసుగు పొరలు
తొలగిపోయి

తప్పలేదు నాకు
పొద్దుతిరుగుడు పువ్వు నై
గాలి కి ఎదురు వెళ్ళక
ఎగరక ....
ఆ రాత్రి అందంలో ఈదులాడక

శూన్యమే ఆకాశమై
భూమికి ఆకాశానికీ మధ్య
ఇంత అందమైన వాతావరణం లో
కామదేనువు గర్భం లో లా
ఓ వింత అనుభూతి

దేవతావస్త్రాలేవో లా
నా ముఖం మీదనుంచి కదులుతూ
గాలి వింజామరులు .... చలి విపత్తు
అయినా
స్వాగతించాలనిపించే మార్పు సుమా!



Thursday, November 27, 2014

మది



గతం తట్టి
దుఃఖసూచక గమనికేదో
గాలిలో వేలాడి
వెంటనే
ఎటో వెళ్ళిపోయి
ఆలోచనల అజాగ్రత్తే .... అది
వేడి వాడి
విషపుకోరల కాలం కాటుతో
భవిష్యత్తు ఓడి
వధించబడుతూ

నిలువునా


శాశ్వతత్వం ఆలోచన
జివితం లోతు
తెలియకే 
సౌకర్యమే
విజ్ఞత, గమ్యం లా 
కాలం కదులుతూ

Friday, November 21, 2014

ఆలోచనల లో


ఆమె,
ప్రతి ఆలోచన 
తీపి వాక్యం
రుచి ....
అనుభూతుల
జ్ఞాపకాల పుటల్లో
తియ్యని బాధను
అక్కడే
ఒదిగి ఉన్న
అక్షర సంపద
ఉనికిని .... నేను

విరుద్ధస్వభావిని


నేను, నాలాంటి మరికొందరి లా
అందరిలోనూ ఒక్కడిని కాని
ఒక వ్యర్థ ఆలోచనను
అసహజ, విలక్షణ వ్యక్తిత్వాన్నై

నీవు నన్ను ప్రేమించడమే
చిత్రం ..... చపలచిత్తమని తెలిసీ
ప్రాముఖ్యత ఇస్తున్నావెందుకో
అని .... అప్పుడప్పుడూ అనిపిస్తుంటుంది

ఎందరి ఆలోచనల్లోనో
నేను ఒక సమశ్యను
నిజం! నిజమూ కావచ్చు
వారి దృష్టి కోణ లోపమూ కావచ్చు


అందరిలా ....
నేనూ ఉండాలని ఎదురుచూడటం
న్యాయమా అన్న ప్రశ్నకు
లేదు సమాధానం నా వద్ద

మంచిదయ్యిందనుకుంటాను
నీకు నేను నచ్చడం
కానీ నాకూ నీవు నచ్చాలని
అనుకోవడమే అస్వాభావికం

నా ఆనంద ఉల్లాసాలను చూడాలని
నీ అబిమతం .... చిత్రంగా
నాలో ప్రశ్నలుగా మారుతూ
ఒక చపలచిత్తుడ్ని లా .... నేను

అయినా నీకు ఇష్టం నేను
ఆ నిజం తెలిసి
ఆనందంతో నేను గాలిలో తేలిపోతూ
వరప్రసాదంగా భావించాలని

నీ నమ్మకం, ఇప్పుడు
నా ఆలోచనలన్నీ
నీవు ఇష్టపడ్డావని తెలిసి
నీచుట్టేనే పరిభ్రమిస్తున్నాయని

అంతులేని నీ ఈ ఆలోచనల
ఊహల రహదారి లో పయనిస్తూ
మరిచిపోయావు సుమా
నాది విరుద్ధస్వభావం అని