వెన్నెల కరిచిన రాత్తిరి

ఎంతో అందమైన రాత్తిరి
తియ్యని
వింత గగురుపాటు నరకపు చలి లో
విపత్తును మోసుకునొచ్చినట్లు
గాలి వాసన

చంద్రుడి ఆకర్షణా శక్తి కి
ముఖం పై
ముసుగు పొరలు
తొలగిపోయి

తప్పలేదు నాకు
పొద్దుతిరుగుడు పువ్వు నై
గాలి కి ఎదురు వెళ్ళక
ఎగరక ....
ఆ రాత్రి అందంలో ఈదులాడక

శూన్యమే ఆకాశమై
భూమికి ఆకాశానికీ మధ్య
ఇంత అందమైన వాతావరణం లో
కామదేనువు గర్భం లో లా
ఓ వింత అనుభూతి

దేవతావస్త్రాలేవో లా
నా ముఖం మీదనుంచి కదులుతూ
గాలి వింజామరులు .... చలి విపత్తు
అయినా
స్వాగతించాలనిపించే మార్పు సుమా!