ప్రేమాలాపన

నీ కళ్ళలో రంగవల్లుల వర్ణాల్ని చూస్తున్నాను.
నీవూ నేనూ, వొకరిలో వొకరం అయి
ఇరు ఆలోచనలు భావనలు వొకటిలా 
బేషరతుగా మనం మమైకం అయినట్లు
"నీదనేదే నాది, నాదనేది లేదు" అన్న
అశరీరవాణి ఆలాపన లా

దూది లా మెత్తగా
తెల్లని మబ్బు లా నీవు.
నీలోకి జారిపోతూ నేను.
ఎన్నో జన్మల కల నిజం అవుతూ
తపస్సు ఫలించిన భావన లా
స్వర్గం అదే అనిపిస్తూ ....

మనసెందుకో తడబడింది.
ఆహ్వానించేందుకు తొలుత
భయం, సందేహం కాలయాపనలనే ఆలోచనే,
నా హృదయద్వారం తెరుచుకుని
గ్రాండ్ గా రక్త తివాచీలు, స్వాగత తోరణాలు
పరిచింది .... నీ కోసం

అవును! అది నేనే! నీవు పొరబడ్డం లేదు.
ఒక ఆకులా నేలను చేరుతూ,
చల్లని గాలిలా మబ్బుల్ని తాకుతూ.
ఒక నక్షత్రం లా భూమిపై రాలుతూ.
ఒక నమ్మకాన్ని, నిన్ను చేరుతూ,
నీలో విలీనమైపోతూ ....

నేనిప్పుడు నీ చిరునవ్వును చూస్తున్నాను.
సున్నితంగా చాచి
అందించిన నీ చేతిని,
మృదువైన నీ స్పర్శను అనుభవిస్తున్నాను.
నీ ప్రేమను శ్వాసిస్తూ ఆస్వాదిస్తున్నాను.
ఈ క్షణాలిలాగే స్తంభించాలని ....

ఇంత సమీపంగా, సన్నిహితంగా
ఎన్నడూ చూడ లేదు నిన్ను. నీ కళ్ళను ....
ఆ మెరుపుల్ని,
ఆ అయస్కాంతం ఆకర్షణా శక్తిని. 
నీవు నిదురించే వేళల్లో నేను కోల్పోయే
ఆ కళ్ళను .... నిన్ను ముద్దాడాలనుంది.