అనిపించింది

చూపుల్తోనే
ఆకట్టుకునే రూపం!
నిన్ను తొలిసారి చూసి
అనిపించింది.
దేవతా కన్యవేమో అని,
నీ కళ్ళలో ఉదయిస్తున్న
ఆ ప్రకాశం
సూర్యోదయమేమో అని,
చీకటికి, శూన్యాకాశానికి
చంద్రుడ్ని,
ఆ తారల్ని వరంగా ఇచ్చి ....
నా కోసం
దివి నుంచి దిగి వచ్చిన
నా ప్రేయసివి నీవు అని,

లేత స్పర్శతో
కమిలిపోయే ....
పాలరాయి శిల్పం లా
నిన్ను తొలిసారి ....
తమకంతో ముద్దాడినప్పుడు
అనిపించింది.
నీ గుండె దడ,
నా గుండె వేగంతో
పోటీపడుతుందని,
వేటగాడి చేతికి చిక్కిన
పక్షికూనలా నీవు
అప్పుడు ....
నీలో కంపనం
నా ఇష్టమే నీ ఇష్టమని
వొదిగుండక తప్పక
వొదిగున్నట్లు

నీకు నేను
అర్ధం అయ్యి,
నేన్నిన్నర్ధం చేసుకున్నాక ....
ఏకాబిప్రాయం,
ఒక్కటవ్వడము న్యాయం
అనిపించింది.
నీ హృదయం
నాకెంతో చేరువలో
ఉన్నట్లు,
మన ఆనందం సంతోషం
పరిసరాల్ని ....
పరిమళాల్తో నింపుతున్నట్లు
మన ప్రేమ
కాలాంతంవరకు
అమరప్రేమై మిగులుతున్నట్లు
అనిపించింది.