నన్నొదిలెళ్ళకు!?

మబ్బులు రాసుకున్న మెరుపు
ఉరుమై
... హృదయం
బ్రద్దలైన శబ్దం
భరించలేని నొప్పి కన్నీరు ...
గొంతు గద్గదమై

మొదటి మేఘ మదనం
తొలిప్రేమ
మహా మాయ
జల్లై కురుస్తున్నప్పుడు
ఒణుకు, తడబాటు
నేనెరుగను
ఎడబాటు ఇంత కష్టమని

భయం నా చుట్టూ అల్లుకుపోయి
సముద్రంలో అల్పపీడనమై
వెంటాడుతుంది
ఆశ, ప్రార్ధన
ఇలాంటి రాపిడి తగదని
నీవు నాతోనే ఉండాలని

మళ్ళీ కురుస్తానని
తిరిగొస్తానని
ఇంద్రదనస్సై అలరిస్తానని
మాటిస్తున్నావు
నా కెలా తెలుస్తుంది
ఎక్కడ, ఎలా, ఏక్షణంలో అని

చీకటి ఊహల్లో,
అనుమానాల్లో వదిలెయ్యకు
తొలకరిచినుకు
సాహచర్యపు మధురిమ
మరిచిపోలేని పుట్టుమచ్చ
అనుక్షణమూ ... కళ్ళముందే కదులుతుంటే ...